لقطة 53 | ابنك وعفة البصر من وهو صغير

ابنك وعفة البصر من وهو صغير

ابنك وعفة البصر من وهو صغير

ابنك وعفة البصر من وهو صغير

#لقطة 53

#ابنك_وعفة_البصر_من_وهو_صغير

 (لقطة أطول من المعتاد = عشان لمة لكم فيها عصارة خبرتي)

👀 عاوزة ابنك من وهو عنده 5 سنين يبقى عفيف عن النظر المحرم، ولو شاف مذيعة في برنامج أو ست في فيديو يخبي الشاشة أو يبص الناحية التانية🙈، ولو شاف صور نساء أو مراهقات في كتاب يطمسها بقلم ماركر إسود🖋 أو يقصها✂️، ولو فيه لعبة/كرتون/برنامج هيموت عليهم = بيسيبهم ببساطة لو فيهم نساء متبرجات👀؟ وعاوزاه لما يكون فيه نساء في أي مكان = ياخد جنب ويعمل مسافة بينه وبينهم لا شعوريًا وما يرضاش يلعب في مكان فيه نساء بتتفرج عليه👀؟ طب وعاوزاه -بعون الله- يستمر كدة لحد ما يكبر ويدخل على البلوغ بسلام وعفة وحياء وتكوني -على الأقل- عملتي إللي عليكي في الأمانة دي قدام ربنا 👀؟ === 👌اسمعي مني..🤚وعن تجربة بكلمك، كلام عملي مش خيال علمي.. وكله بحول الله وقوته وتوفيقه وتثبيته، وأولا وأخيرا {إنما أنت مذكر} و{إن عليك إلا البلاغ}..

🐠🐠🐠 ولادي الصبيان، أصغرهم 5 سنين وأكبرهم 14 سنة.. بفضل الله كل واحد فيهم:

⛱من صغره معلماه = إن فيه حاجة اسمها ((حَرَم النساء))، دة ممنوع الاقتراب منه سواء بالنظر أو اللمس أو الاختلاط أو غيره إلا لحاجة شرعية، أو ضرورة شرعية، أو بعلاقة شرعية.. وفهمته العلاقات الشرعية دي من آية "المحرمات من النساء" في سورة النساء(23)/ ومن آية "الزينة" في سورة النور(31)

⛱ دايما بقول له = "إنت راجل"، "خبي عينك عن النساء"، "المسلم غيور على حرمات الله"، "إنَّ اللَّهَ يَغَارُ، وإنَّ المُؤْمِنَ يَغَارُ، وَغَيْرَةُ اللهِ أَنْ يَأْتِيَ المُؤْمِنُ ما حَرَّمَ عليه."...إلخ

⛱ لو فاتحين لعبة على النت على الكمبيوتر، وفيه في الجنب إعلانات لعب تلبيس البنات وكدة = علمته إنه يغطيها بورقة أو كراسة قبل ما يلعب، "كراسة غض البصر"..

⛱ أي لعبة/ تطبيق/ فيديو/ سلعة/ قصة/ كتب تعليمية/ معجون أسنان/ مجلة موبيليا/ باكو حاجة حلوة..إلخ، فيهم صور نساء أو مراهقات = بعلمه إنه يتركها لله لو مفيش طريقة يستعمل بيها الحاجة دي من غير وجود الصورة دي –يعني لو مش عارف يطمسها بقلم ماركر إسود أو يقطعها، يتركها لله- خصوصًا إن أكيد فيه ليها بديل.. وبشجعه بالفعل عمليا = عن طريق إيجاد البديل الطيب دة، من باب تثبيته وتأليف قلبه على الطاعة وتزيينها في قلبه.. وعن طريق الحديث: "إنك لَن تدَع شيئًا للهِ عزَّ وجلَّ إلا بدَلك اللهُ به ما هو خيرٌ لكَ منه"/صحيح..

⛱ حتى داخل التطبيقات البسيطة زي تطبيقات التلوين إللي اسمها ماندالا –زخارف فنية للتلوين* = بنقّي منها فقط إللي مافيهاش أي صور نساء هتتلون، وبفهمه دة بوضوح.. وبجهد وبحث بسيط -لله- بنلاقي البديل الطيب، #ماتستسهلوش_الأقرب..

⛱حتى لو قصة في المنهج الدراسي عنده، فيها صور نساء سافرة ومحتوى أدبي لا علاقة له بالـ((أدب!!)) كلها فجور ووثنيات وغراميات بين رجل وامرأة مش متزوجين ورقص ومياعة واختلاط وتبرج وقرف -زي ما حصل مع ابني الكبير السنة دي –إعدادية أزهر!- في قصة مادة الإنجليزي، ولقيته بعد أول حصة جاي يشتكيلي من محتوى القصة وبيطلب إننا نطلب من المدرس إنه ما يذاكرهاش معاه ولا يسأله فيها ولا يجيبله سيرتها أصلا في الدرس! شجعته طبعا وقلتله: ولو حتى مادخلتش بيها الامتحان = مش مهم -خصوصا إن هي أصلا عليها درجتين تلاتة فقط- اتقن باقي المنهج وسيبها.. وطلبنا من المدرس يستخرج منها فقط الأسئلة والأجوبة إللي مافيهاش أي منكرات، ويبقى يديهاله في ورقة يذاكرها هي فقط، ورزقه على الله، ومن يتقِ الله يجعل له مخرجا، ويرزقه من حيث لا يحتسب.. #يقين👌☝️.. (هما تعليم منزلي وبيجيله مدرس في المادة فقدرنا نعمل دة بفضل الله لإنه في كان استطاعتنا، فاتقوا الله ما استطعتم).

⛱وإحنا بنتفرج على برامج معينة في التليفزيون = الريموت على طول في إيدي، عشان لو جت ست -ولو حتى مذيعة في نشرة الأخبار- يخبي الشاشة بزرار القايمة -المنيو- لحد ما تمشي صورتها، وبقول بصوت مسموع: "أستغفر الله العظيم.. ربنا يهديكي.." وطبعا ماسحين كل القنوات إلا عدد يتعد على الصوابع زي سمسم والقرآن والأخبار وناشيونال.. ومفيش حاجة اسمها فافتحالهم التليفزيون على قنوات وسايباهم لوحدهم، إلا لو فاتحين قناة سمسم أو الكعبة مثلا، فقط...

⛱ ولما بيكون العكس -راجل هو إللي بيظهر وبيكون بهيئة تستلزم غض البصر عنه زي لاعيبة الكورة وشورتاتهم اللطيفة أو الرجال إللي بيبقوا في أفلام ناشيونال جيوجرافيك وغيرها- بدوّر وشي أنا الناحية التانية وبيشوفوني وأنا بعمل دة بوضوح.. ولما حد فيهم بيبقى عاوزني أتفرج معاه على لقطة جون بس الكاميرات بتعمل زووم على اللعيبة وأجسامهم = بغض بصري أو بخبي بصباعي اللقطة المعمول عليها زووم، لحد ما تبعد، وبتأكد إنهم واخدين بالهم من تصرفي دة وفاهمين ليه..

⛱ كذلك مفيش نت مفتوحة لوحدهم.. ومفهماهم إن دة بسبب إن الفتن والعري والفجور هناك في كل حتة ومش هقدر أسيبهالكم في حيازتكم 100% قبل ما أطمن إن عودكم الإيماني اشتد ضد الفتن أو بقيتوا مسؤولين عن صحيفتكم خلاص -زي ما قلنا في لقطة "الابتزازا التربوي"- وإلا ربنا هيحاسبني أنا لإنكم لسة مسؤولين مني.. وشافوا بنفسهم حاجات من باب النظر الفُجأة، وأيقنوا إني عندي حق فما عندهمش مشكلة في ((التقفيل)) دة طالما بجيب لهم أنا منها إللي محتاجينه ببدائل طيبة، أو بقعد معاهم وهما بيجيبوه بنفسهم..

⛱ لو غصب عنه شاف صورة/ أو ست مما ينبغي غض البصر عنه = علمته يغمض عينه أو يبعد نظره بعيد عنها على طول، زي ما النبي ﷺ قال لناعند النظرة المفاجئة: ((اصرف بصرَك))... ولو فكر يبص تاني من باب الفضول حتى = بعلمه وصية النبي ﷺ: "لا تُتْبِعِ النَّظرةَ النَّظرةَ.. فإنَّما لكَ ((الأُولى))، وليستْ لكَ الآخِرةُ -أي الثانية"..

⛱ولو أي صورة/ست في الشارع فلتت منه ولاقيته باصص عليها / أو سرحان ناحيتها حتى ومش قصده = بلف وشه بإيدي الناحية التانية بطريقة لطيفة وأقول له: النبي ﷺ لو كان هنا كان عمل معاك كدة، زي ما عمل مع الفضل بن العباس بالظبط، لما كان واقف مع النبي و جت ست جميلة تستفتيه ﷺ في مسألة تخص الحج، والفضل ينظر إلى وجهها، فأخَذَ النبي ﷺ بذَقَنِ الفَضْلِ، فَعَدَلَ وجْهَهُ عَنِ النَّظَرِ إلَيْهَا..

⛱ أي مشوار بنروحه في مصر ويكون فيه إعلانات سافرة على الطريق -وما أكثرها للأسف!- معوداهم يفتحوا أجهزتهم في المشوار دة -استثناءً للقاعدة إللي قلنا عليها في منشور "قوانين الأجهزة"، قاعدة ((مافيش أجهزة في المشاوير))- ومفهماهم بوضوح إن الاستثناء دة هنا عشان أعينهم على غض البصر..

⛱ مش باخده معايا أماكن زي الأسواق مثلا أو المولات إللي بيكون فيها صور نساء ولبس نساء وزينة نساء متبرجات.. وبالذات أو محلات بيع أدوات التجميل والأغراض النسائية مستحيل آخده معايا.. وبنحاول لما نتمشى معاهم في شوارع نتجنب الأماكن دي ونختار الشوارع المحترمة نوعا ما إللي مافيهاش الفتن ظاهرة على كل جانب، وبنفهمهم دة بوضوح، وبنطلب منهم طول ما هما ماشيين يخفضوا أبصارهم قدر الإمكان زي النبي، جاء في وصفه ﷺ أنه كان ((خافض الطرف.. نظره إلى الأرض أطول من نظره إلى السماء)).. ﷺ 💚..

⛱ لو ناس من قرايبنا أو صحابنا إدوا موبايلهم لابني في وجودي، بنبههم إن بلاش يفتحوا لهم أي ألعاب خاصة بالنساء أو فيها صور نساء أو يكون فيها بنات مش مؤدبة أو موسيقى أو مشاهد رعب مفزعة، وبطلب منهم أساسي يقفلوا النت وابني بيلعب على جهازهم، لإن النت وهي مفتوحة دة بيخلي الإعلانات إللي في التطبيقات تظهر، ومعروف إعلانات بقت مرادف لإيه للأسف😐!

⛱ وعلمته لو أنا مش معاه وفيه حد كبير إداله موبايل = يطلب منه كدة، وإن دة مِن حِفظ اتفاقنا بالغَيب وكفى بالله شهيدا، وما يفتحش ستوديو الصور إللي على موبايلات النساء أبدا إلا لو طمنوه إن مافيهاش حاجة نسائية.. ولا يفتح الصور على موبايل الرجال إلا لما يطمن من صاحب الموبايل لإن ممكن يكون فيه صور لأهل بيته بدون حجاب أو صور نساء عموما في نكت وغيره، ما هو مش كل الناس يا ابني يا حبيبي بتحترز للعورات دي على أجهزتها للأسف😐..

⛱⛱⛱ وربطت لهم كل إللي فوق دة من منظومة غض البصر عن العورات، بـ ((حفظ الفرج)) والعوارات، عن طريق تكرار الآيتين دول دايما زي اسمهم: {قُل لِّلْمُؤْمِنِينَ يَغُضُّوا مِنْ أَبْصَارِهِمْ وَيَحْفَظُوا فُرُوجَهُمْ} .. {وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ وَيَحْفَظْنَ فُرُوجَهُنَّ}..

🏠🏠🏠 طيب من إمتى نبدأ؟ 

= من أول ما ابنك يعقل الأمور دي.. أنا ببدأ من وهما 3-4 سنين مثلا، بلمحات بسيطة كدة عن الحياء ثم بالتدريج بزود حسب الاستيعاب، لحد سن من7-10 سنين كدة = بركز عشان أحدد هل أطلب من النساء الالتزام قدامه بالحجاب التام والا لسة، حسب هو بقى صبي مميز وما بقاش من {الطِّفْلِ الَّذِينَ لَمْ يَظْهَرُوا عَلَى عَوْرَاتِ النِّسَاءِ} والا لسة، وساعتها بنبهه إن خلاص لا يجوز له احتضان أو تقبيل أو عدم غض البصر عن البالغات أو المراهقات من غير النساء المُحَرَّمات لإنه خلاص كِبِر وبقى صبي مميز.. لحد ما يقرب على البلوغ وتكون اكتملت عنده المنظومة بالكامل، لبنة لبنة، إن شاء الله..

🐧🐧 ختاما 🐧🐧 

((الصبيُّ وإن لَم يَكن مُكلَّفًا، فوليُّه مُكلَّف لا يَحِل له تَمكينُه من المُحرَّم؛ فإنه يَعتاده، ويَعسُر فِطامه عَنه))*ابن القيم.. #دي_تربية_السلف_لمن_يهمه_الأمر ✋☝️

🌀 نضفوا عيونهم وقلوبهم بالحياء والعفة..

🌀 عودوهم على دة من وهما صغيرين جدا وما تقلقوش هيتعودوا

🌀 فهموهم على أد عقولهم الأسباب الشرعية لدة وثواب دة عند ربنا وحب ربنا للحياء وحفظ البصر والفرج، بالتدريج...

🌀 وأكيد هيبقى فيه أحيانا ممانعة ومشاكسة ومشاغبة، لكن بالتمرين والصبر والحب والدعاء والقدوة هينسجموا مع توجيهاتك إن شاء الله طالما التعويد من صغرهم على المنظومة كلها بدون تناقض للتوجيهات مع القدوة.. #بكلمك_عن_تجربة.. #أبشري_واصبري_وإن_عليك_إلا_البلاغ ..

..🌿 الحياء نبتة بتحتاج غرس من بدري وسقاية مستمرة 🌿.. 

و ابنك على ما تعوديه وتربيه👌..

💀💀وحسبنا الله في الكفرة وأعوانهم إللي متعمدين يحشروا ست في كل حاجة عشان يهتكوا حُجُب حياء ولادنا ويناتنا ويفسدوا فطرتهم النقية بتكرار النظر للعورات..

**كلام ممكن تستغربوه في زماننا دة، بس النبي ﷺ علمنا "بدأ الإسلام غريبا ويعود غريبا = فطوبى للغرباء".. وطوبى لمن قبض على الجمر واحتسب الأجر من الله..

**وإن شاء الله فيه لقطة تانية مخصوص عن "العوارات" فقط..

*هامش: ماندالا: بسميها للولاد "زخارف فنية" مش ماندالا، عشان كلمة ماندالا كلمة وثنية..

#لقطات_تربوية

#أسماءمحمدلبيب

أمةالله-عفا الله عنها